كلمة سهلة على اللسان ::: لكنها صعبة على اليتيم
اللي غدر بيه الزمان ::: وخلاه فى الدنيا لطيم
اتساوى فرحه ويا حزنه ::: وتااه فى الهنا وسط الجحيم
صعب غدرك ياليالي ::: صعب جرحك ياسنين
صعب تتحرم فى ثانية ::: من قلب كان بيك رحيم
صعب تتحرم من كلمة ::: استحالة تقولها ولو لمين
خلاص يا أمي مش هشوفك ::: خلاص يعني بقيت يتيم
مش بعترض أبدًا يا ربي ::: بس قاتلني الحنين
مين هيجي يوم نجاحي ::: ولا يفرح بيا مين
مين يأما فى يوم زفافي ::: يعدل الطرحة ولا يرش الملح مين
مين يا أمي هيوصيه عليا ::: اياك تزعلها ولا فى يوم ليها تهين
ناس تزغرط .. وناس تهيص ::: وناس بتسأل أم العروسة فين
وناس بيصعب عليها حالي ::: كان مستخبيلك دا فين
وناس فرحتها مكسورة ::: والدمع شايلينه عالخدين
وناس من كتر أحزانها ::: يومها بيعدى سنين
أكيد هتيجي تفرحيني ::: وبايدك ياأما تذوقيني
ماهو استحالة هتسبيني ::: سامعة ياأما صوت حنيني
شايفة دمع قلبي وعيني ::: أبوس ايديكي اوعديني
نفسي أشوفك ولو للحظة ::: يتقلب حزني لفرحة
ياترى يا أمى هتعرفيني ::: معلش يا أمي أعذريني
دا الحزن علمَ فوق جبيني ::: وملامحى تاهت ويا سنيني
مابقتش أنا بنوته زمان ::: واللى كان أبسط فرحها
عروسة لعبة أو حصان ::: أتغيرت ياأمي صدقيني
الهم علم على ضناكي وأترسم ::: وبعدك عني دا أمر اتحسم
طب أهون عليكي هتسبيني ::: شايفة صورتك قدام عنيا
يس مش لامسة حاجة أيديا ::: نفسي ياأمي تحضنيني
بدعيلك ياأما فى صلاتي ::: وبوصي بردوا اخواتي
من اللى انتي زمان علمتيني ::: فى جنة ربي ونعيمها
وبحق آيات القرآن وتفسيرها ::: والله ياأمي وحشتيني
*الشاعرة تعمل بمدرسة الشيخ عيسى الابتدائية بإدارة قنا التعليمية
